About Sa Lon Krio

Preserving Sierra Leone's linguistic heritage for future generations

Founder of Salonkrio.com

Esme James (Ɛsmi Jems) , na in stat di kɔmpni we nɛm Sa Lon Krio, ɛn na in na di Chif Ɛgzɛkyutiv Ɔfisa. Bifo I bigin ɔl dis, na bin skul ticha ɛn da tɛm de, i bin ɔlso de tich Krio to big man ɛn uman dɛm we kɔmɔt ɔda kɔnti ɛn wan lan fɔ tɔk, rid ɛn rayt di langwej. Tide, in ɛn in tim dɛm bizi de put togɛda matiriyal fɔ big pɔsin ɛn pikin dɛm we tap na Sa Lon, ɛn di wan dɛm we tap ɔda say. Wetin de na Ɛsmi Jems in ed, na fɔ si ebri Sa Lon pɔsin sabi fɔ tɔk, rid ɛn rayt dis langwej, we na di langwej we dɛn bɔn mit dɛn mama de tɔk (ɛn ɔlso na di langwej we bɔku pipul na Sa Lon sabi tɔk). Wɛn dat apin, bɔku buk, magazin, ɛn nyuzpepa dɛm go de na di kɔntri ɛn Sa Lon pipul dɛm nɔ gɔ lɛf biyɛn pan politiks, ɛdukeshɔn, ats ɛn ɛntatenment.

Wetin Wi De Fɔ

Sa Lon Krio nɔ de nɔmɔ fɔ mek pipul dɛn lan sɔmtin. Na ɔlso muvmɛnt fɔ sɛlibret, kip ɛn sheb wit ɔlman, di fayn langwej ɛn kɔlchɔ we Sa Lon gɛt.

Wi Mishɔn

Sa Lon Krio in men mishɔn na fɔ ɛp Sa Lon pipul dɛm ɛn ɛnibɔdi ɛls we wan fɔ lan fɔ tɔk, rid ɛn rayt Krio, fɔ du so di kɔrɛckt we. Krio na sho udat wi bi, ɛn wi biliv se ɛnibɔdi we sabi tɔk di langwej, fɔ ɔlso no aw fɔ rayt am ɛn rid am. Wɛn dat apin, dɛn wan we kam afta wi, rayt dɔnŋ to gɛnareshɔn dɛn we nɔ bɔn yet, go prawd fɔ wetin Papa Gɔd gi wi.

Wi Vishɔn

Wi na Sa Lon Krio wan fɔ si ɔl Sa Lon pipul dɛm na Sa Lon ɛn ɔda say, we ɔlrɛdi sabi tɔk Krio, lan fɔ rid ɛn rayt di kɔrɛkt we, as wɛl. Dis go ɛp dɛm fɔ rayt poɛm dɛm, ple dɛm, buk dɛm ɛn fɔ ivin nyuzpepa dɛm na di langwej. Di only we we dis go apin na wɛn dɛn de tich Krio frɔm nɔzri skul ɔp to yunivasiti lɛvul.

Di Pipul Dɛm We Stat Sa Lon Krio

Ɛsmi Jems ɛn sɔm ɔda pipul dɛm we biliv se ɛbri Sa Lon pɔsin fɔ sabi rid ɛn rayt di Krio langwej, na dɛm put dis wɛbsayt togɛda fɔ mek mɔ pipul go no bɔt di langwej. I dɔn rich tɛm we wi nɔ fɔ lɛ pipul dɛn de tink se Krio nɔto langwej.

Wi biliv ɛn de agyu se, Krio na langwej we ɔlman fɔ de tɔk, de rayt ɛn de rid. Krio na ful ɛn kɔmplit langwej. I gɛt in yon spɛlin we totali difrɛn frɔm Inglish langwej. Krio nɔto brokɛn Inglish, nɔto pijin, ɛn nɔto patuwa, as plɛnti pipul kin tink.

Di mɛmba dɛm we jɔynan pan dis projɛkt tap na Sa Lon, Inglan ɛn Amɛrika, but dɛn ɔl na Sa Lon pipul dɛm. Dɛn ɔl mek ɔp dɛn maynd se de dɛn fɔ sev dis langwej we nain most pipul na Sa Lon de tɔk ebride. Dɛn siriɔs fɔ mek shɔ se di nɛks gɛnareshɔn dɛm – wi pikin ɛn granpikin dɛm – fɔ lan ɔltin bɔt di langwej, dat is, di kɔlchɔ ɛn tradishɔn dɛm we mek di langwej bi wetin i bi.

Dis wɛbsayt de fɔ kɔrɛkt ɔl di mistek dɛm we pipul dɛn kin mek wɛn dɛn de rid ɛn rayt di langwej. Wi biliv se if wi nɔ tek tɛm rayt di langwej dɔŋ fɔ dɛn wan we de kam afta wi, di original langwej we wi ol pipul dɛm bin lɛf gi wi, go disapia ɔltogɛda, ɔ wetin lɛf go jɛs fiba di rial langwej, bɔt I nɔ go bi di sem, atɔlatɔl.